((((((((((((((***قبل النهاية***)))))))))))

قبل النهاية


لو يوم غابت شمسنا
أو غيم عليها يأسنا
وعجزنا عن فهم نفسنا
هنصرخ ننادي على بعضنا
أو نكتب بأدنا نهاية عمرنا
لو يوم نسينا نفسنا
وداست رجلينا غرسنا
وقعدنا نندب حظنا
ويموت يوم ولدته الولد
يبقى بنكتب نهايتنا بخطنا
لو يوم طفينا شمعنا
وحرقنا بأدنا زرعنا
وهدينا بأدنا عشنا
وسلمنا أرضنا للغشنا
يبقى كتبنا نهاية أمرنا
لما تموت الصبية يوم عرسها
ويضيع الولد اللي هيحمي ضهرنا
ونعدم بالذل نفسنا
ونسلم للغريب شرف بعضنا
حقه خلاص يمحي مجدنا
يا ولد العم
دا الحال بقي غم
وزاد الهم هم
ولو عشان حفنة ملاطيش
أشتريني ومتبعنيش
لحسن اللي بيخوفني اليوم
بكره ينزل فيك تلطيش
ده الزرعة حكاية وحدوتة
وأنا أيدي ليك بالخير ممدودة
مش بالخيانة تاخد التار
ده الخيانة هتزدها نار
وهيطول معها الليل
و-يمكن- ميجيش بعده نهار
يا أبن العم
لم الشمل
زم الدم
ده أرضي أرضك
شرفي شرفك
وفي الآخر…
دمي دمك.!